Aste honetan Oria eta Araxes ibaiak garbitzen hasi dira; ibaietan eta horien inguruan pilatutako hondakinak jasotzen ariko dira datozen asteetan Gureak enpresako langileak.
Bestalde, eta gaiari lotuta, Andre Maria elizaren atzeko ibai eremua zaintzeko eskatu die udalak hara joaten direnei. «Harrizko hondartza bat dago Armeria plazako eskailerak jaitsita, eta hara joateko ohitura sortu da azkenaldian. Horregatik, eta zaborra pilatu denez, kartel bat jarri dugu arazoari buruz ohartarazteko», esan du udalak. «Ingurumenak eta elkarbizitzak behar duten begiruneagatik, herria ahalik eta txukunen zaintzea eskatzen diegu bisitariei eta herritarrei», gaineratu du.
Gaikako bilketak behera
Tolosaldeko Mankomunitateak birziklapenaren inguruan Tolosan atera dituen azken datuen arabera, gaikako bilketak behera egin du azken bost urteotan. Organikoaren edukiontzian jasotzen denaren % 18,13 ez da organikoa, eta errefusarenean jasotzen denaren % 44,67 birtziklagarria da. «Behar bezala ez sailkatzeak gainkostua dakar hondakinen tratamenduan», adierazi du udalak.
Esteka honetan dago ikusgai Tolosaldeko Mankomunitateak banatu duen esku-orria.