Makinak prest daude Tolosako Zuloaga auzoko lanei ekiteko. Bertako bidea hondoratu egin da pixkanaka, higatzen joan delako, eta ezpondako materiala irristatu egin delako. Hori dela eta, bidea egonkortuko dute, irisgarritasuna hobetzeko. Girder Ingenieros enpresak garatu du proiektua, eta 81.309,25 euroko aurrekontua izango du (BEZ barne).
Aurreikusten dutenez, sei aste iraungo dute lanek, eta tarte horretan, zenbait aldaketa eragingo dituzte inguru horretako trafikoan eta aparkalekuetan. Ezingo da aldapatik kotxez igaro, ezta bertan aparkatu ere; mugikortasun urriko pertsonentzako bi plazak bakarrik egongo dira erabilgarri. Halaber, lanerako materiala pilatzeko gunea beharko dute langileek, eta horregatik, Belate pasealekuko aparkaleku batzuk kendu egingo dituzte aldi baterako. Udalak herritarrei eskatu die, inguru horretatik igarotzean, kontuz ibiltzeko.