San Joan jaiei hasiera ematen dien txupinazoa bota aurretik festan murgildu dira herritar ugari. Izan ere, Helduen Eguna da gaurkoa, eta goizean hasi dira euren ospakizunekin Iturriza, Harizpe eta Beti Gazteak elkarteko kideak.
Harizpe elkartean hasi dute eguna, hamaiketakoa eginez, musika eskolako akordeoi-jotzaileek girotuta. Bertan elkarri kontuak egiteko tartetxoa hartu eta gero, kalejiran abiatu dira akordeoien erritmora. Geldialditxoa ere egin dute taldeko argazkia egiteko. Eguneko hitzordu nagusia Zerkausian duten bazkaria da. 200 erretiratu inguru bilduko dira, eta ondoren dantzaldia izango dute.