Ekainaren 6ean izango da Sormenetik ekimenaren urteko lehenengo saioa. Galtzaundi Tolosaldeko Euskaltzaleen elkarteak sormenari eta euskal kulturari buruz gogoeta egiteko antolatzen dituen saioak dira. Kasu honetan, gazte sortzaileak gonbidatu dituzte Tolosako Zerkausiaren azpialdera. Iraia Cambra, Julen Unanue eta Luma Otaño elkarrizketatuko ditu Alexander Padilla kazetariak, 12:00etan hasita.
Tolosako kale erabilera neurketek adierazten dutenez, euskara indartsuen larunbateroko azokaren bueltan dago eta Sormenetik egitasmoaren bitartez euskara indartsuen dagoen guneari hauspo berria eman nahi zaio. Bestetik, kultur espresio ezberdinak gune berean batu asmo dira, kultur hausnarketarako eta heziketarako gune bilakatu eta bateko eta besteko herritarrak eta kultur espresioak ezagutzera emateko. Hori dela eta, euskara, sorkuntza eta azoka elkarren artean aberasteko, Sormenetiken edizio berri honetan ere publikoak euskal sortzaileen ikuspegia zuzenean jasotzeko aukera izango du.