Tolosako Udalak maiatzaren 15ean zabaldu zuen ondasun higiezinen zerga ordaintzeko borondatezko epea, eta ekainaren 30eko 13:00etan amaituko da. Aldiz, hondakin-bilketaren, ibi iraunkorren, Belena patioko bizikleta aparkalekuen –lehen seihilekoa– eta autotaxien tasa ordaintzeko borondatezko epea gaur ireki dute, eta uztailaren 7ra arte egongo da zabalik.
Ordainketa horiek helbideratuta dituztenei azken egunean kobratuko diete tasaren zenbatekoa. Helbideratu gabe dituztenek, berriz, ekainaren 12ra bitarteko epea dute ondasun higiezinen zergaren kasuan, eta gainerako kasuetan, hilaren 19ra artekoa.
Era berean, helbideratu ez dituztenei ordainagiriak bidaliko zaizkie, zergadunek adierazitako zerga-helbideetara. Zergadunek oraindik ondasun higiezinen zergaren ordainagiria etxean jaso ez badute, udaletxean eskatu behar dute. Gainerako tasen ordainagiria ekainaren 19rako jasoko dute etxean. Hala ez bada, kasu honetan ere, udaletxera jo beharko dute ordainagiria eskatzera.
Ordainketa hiru modutara egin daiteke: online, Eusko Jaurlaritzaren Nire Ordainketa atalean; erakunde kolaboratzaileen –banku, aurrezki-kutxa eta kreditu-kooperatibak– bitartez, ordainagiria aurkeztuta; edo udaletxean, kreditu txartelarekin.