Etzi, larunbata, 22. Roberto Jauregiren Oroimenezko Hegats Igeriketa Txapelketa izango da Tolosan, Usabal kiroldegiko igerilekuan. Igarondo Urpekoak taldeak antolatu du, eta Euskal Herriko, Herrialde Katalanetako, Kantabriako eta Aragoiko 12 eta 15 urte bitarteko 170 igerilarik parte hartuko dute.
Egun osoko txapelketa izango da. Goizeko kanporaketak 10:00etan hasiko dira; arratsaldeko txanda, berriz, 16:00etan hasiko da. Askotariko probetan parte hartuko dute igerilari gazteek, eta antolatzaileek aurreratu dutenez, «ikusleentzat formatu ikusgarria» izango da.
Klubak adierazi du «ahal den modu onenean, igerian» omenduko dutela Jauregi. «Hura izan zen hegats igeriketa Tolosara ekarri zuen entrenatzailea, eta edonori laguntzeko prest zegoelako ezagutzen du tolosar askok».