Datorren ostiralean, maiatzaren 29an, 19:00etatik aurrera, Tolosako Trianguloa plaza modaren eta joera berrien erakustoki nagusi bihurtuko da hirugarrenez. Tolosa&Co merkatarien elkarteak antolatuta, Tolosa&Co Fashion Show desfilearen edizio berri bat egingo dute, «herriko saltokien eta tokiko merkataritzaren talentua, aniztasuna eta potentziala balioan jartzeko asmoz».
Nerea Alias aurkezleak aurkeztuko du, eta Alai DJak girotuko du moda desfilea. Pasarelan zehar, Tolosaldeko eta inguruko 46 modelo ariko dira herriko 28 dendatako udaberri-uda denboraldiko jantzi eta osagarri onenak erakusten. Gainera, desfilearen erdialdean, Izaro Urrestarazu eta Sua Enparantza dantzariek osatutako Suaro taldearen eskutik dantza emanaldi berezi bat izango da ikusgai. Ilea apaintzeaz eta makillatzeaz Tolosako Inmakuladako ile-apainketa eta estetikako oinarrizko lanbide heziketako ikasleak arduratuko dira.
Erosketak errazteko teknologia eta hurbiltasuna
Tolosa&Co-k herritarrei eta ikusleei erraztasunak eman nahi dizkie pasarelan ikusitako jantziak eskuratzeko. Horretarako, Gogoko zerbitzua eskuragarri egongo da: WhatsApp bidez (688 750 783 zenbakira idatzita), edozein produktu erosi eta etxean jaso ahal izango da. Ekitaldia guztiz irekia eta doakoa da, ez da sarrerarik behar, eta antolatzaileek herritar guztiak gonbidatu nahi dituzte modaz gozatzera eta tokiko ekonomia babestera.