Urteroko ohiturari jarraituz ospatu dute Harri jaia Bedaion. Asentsio egunetik zortzi egunetara egin dute aurten ere, eta toka-txapelketa, bazkaria, bertso saioa eta afaria izango dituzte, besteak beste.
Egun bereziko egitaraua elizkizun batekin hasi dute, 12:00etan, Andre Maria Jaiokundearen elizan. Bertatik abiatu eta prozesioa egingo dute San Isidrorekin, larreak eta soroak bedeinkatzeko. Eguerdian, berriz, Artubi elkartean bildu dira bazkaltzera hogeita hamar lagun pasatxo.
Arratsaldera begira bertsolarien saioa izango dute, eta eguna afariarekin amaituko dute, 20:30ean; hori ere, Artubi elkartean.
Urteroko hitzordua
Harri jaia bakarrik ez, Bedaion urtero hutsik egin gabe antolatzen duten beste hitzordu bat da Bedaioko mendi martxa; eta, aurten, ekainaren 7an egingo dute.
Ibilbidearen bitartez Bedaioko inguru naturalak ezagutzeko aukera ematen du ekimenak, eta bidean zehar hainbat anoa gune jarriko dituzte. Bukaeran, ohitura duten bezala, haragi egosia, txorizoa eta salda banatuko dituzte bertaratzen direnentzat.