Tolosa eta bere kaleak prest daude Musikherriaren hamabigarren edizioarekin gozatzeko. Maiatzaren 30ean izango da, eta herriko musika taldeak jai-giroan elkartuko dira, askotariko doinuak herriko zenbait txokotan interpretatzeko. 200 musikari inguru bilduko dira, hogei musika taldetan banatuta.
10:00etan hasita, Tolosako dultzaineroek, Giro Arte dultzainero taldeak, Udaberri fanfarreak eta Iraunkorrak txarangak dianak egingo dituzte Larramendi, Amarotz, Belate, Izaskun, San Esteban, Iurre eta Berazubi auzoetan. 11:00etatik aurrera, berriz, erdigunean joko dute Eduardo Mokoroa eta Isidro Larrañaga musika eskoletako ikasleek, Konponezinak txarangak, Uztaritzeko Herri Soinua elkarteak eta Tolosako txistulariek.
12:00etan, askotariko estilotako zenbait musika taldek kontzertuak egingo dituzte herriko hiru gunetan: Lopez-Mendizabal pasealekuan eta Euskal Herria plazan, Isidro Larrañaga musika eskolan sortutako taldeek eta akordeoi orkestrak; Plaza Berrian, berriz, Hodeiertz eta Lask abesbatzek, Eduardo Mokoroako ikasleen bandak eta klarinete taldeak. Bestetik, Tolosa Kantari Alde Zaharrean ariko da.
14:30ean, Zerkausiko bazkari herrikoian elkartuko dira. Parte-hartzaileak gonbidatuta daude, baina herritar orok du bertan bazkaltzeko aukera, txartela erosita. Larunbatetik aurrera egongo dira salgai Xirimiri eta Orbela tabernetan, 15 euroan; 14 urtez azpiko haurrenak, 10 euroan. Laskorain ikastolak prestatuko du bazkaria, eta irabaziak Zutani elkartearentzat izango dira.
Arratsaldea girotzeko, jai-giroko erritmoak eta erritmo bereziak nahasten dituen Les Incognitos taldeak Alde Zaharra girotuko du, 18:00etan hasita. Gauean, berriz, bi kontzertu izango dira Euskal Herria plazan. 22:30ean, Moonshine Wagon heavy-bluegrass estiloko talde gasteiztarrak egingo du saioa. 00:00etan, berriz, Olloki taldea igoko da oholtzara. Andoni Oilokiegi musikari pasaitarraren proiektu berria da, eta rocka, pop-rocka eta ukitu elektronikoak uztartzen ditu.