Igandean, barroko garaiko musika entzuteko aukera izango da Tolosan. Herriko Hodeiertz abesbatzak, Ordiziako Oroithek eta Euskal Herriko kontserbatorioetako irakasle eta ikaslez osatutako Andra Mari Orkestrak Sacrae Harmoniae kontzertua egingo baitute San Frantzisko elizan. 19:00etan hasiko da emanaldia, eta sarrera doakoa da.
Hiru musikagile italiarrek XVII. eta XVIII. mendeetan idatzitako obrak interpretatuko dituzte: Alessandro eta Domenico Scarlatti aita-semeak eta Gregorio Allegri. Andoni Sierrak zuzenduko du kontzertua, eta lau bakarlari egongo dira: Zuhara Etxabe sopranoa, Mario Hernandez altu-ahotsa, Aitor Garitano tenorra eta Kepa Mujika baxua.