Amaitu da Tolosako I. Zaintza Planaren mahaia osatzeko zenbait eragilerekin egindako lehen entzuketa fasea. Udalak esan du parte hartzaileen ekarpenei esker askotariko proposamenak jaso dituela, eta gaur, Tolosako zaintza ekosistema egituratzeko hausnarketari hasiera emateko saio bateratu bat egingo dute; 17:00etan izango da, kultur etxean.
Gaur arte, sektoreka lan egin dute, eta eremuz eremu zehaztu dituzte dauden behar, interes eta ekintza proposamenak. Honako sektore hauek izan dituzte kontuan: adineko pertsonen eta desgaitasuna duten pertsonen zaintza, haur eta nerabeen zaintza, eta zaintzaileen zaintza. Hemendik aurrera, ordea, eragile komunitario, sozioekonomiko eta publikoen arteko lankidetzan oinarritutako prozesu bateratua egingo dute. Horregatik, saioan parte hartzera gonbidatu dituzte elkarlanean aritu diren edo/eta interesa izan dezaketen herritarrak.
Saioaren egiturari dagokionez, lehenik, entzuketa fasearen ondorio nagusiak partekatuko dituzte. Ondoren, taldekako hausnarketa egingo dute, Tolosako zaintza ekosistemaren ikuspegi partekatua sortzeko. Azkenik, Tolosako zaintza ekosistemaren egitura zehaztuko dute; hau ere, taldeka.
Saioan, aurrerapen moduan, datozen asteetan herritarren artean zabalduko den galdetegiari buruzko lehen xehetasunak emango dituzte. Galdetegi horren helburua da tolosarrek ongizate emozionalaren inguruan dituzten beharrak identifikatzea eta udal-zerbitzu, programa eta ekintzak hobetzeko proposamenak jasotzea.