Gaur ezagutu dugu Gipuzkoako Herriarteko Bertsolari Txapelketako finalerako txartela lortu duen bigarren taldea. Tolosako Bonberenean jokatu dute finalaurrekoa Goierriko Zumarraga-Urretxu eta Bidasoako Txingudi A taldeek. Goierritarrek irabazi dute, eta ondorioz, maiatzaren 30eko finalerako txartela eskuratu dute.
Manex Mantxolak, Mikel Iturriotzek eta Antton Fernandezek ordezkatu dute Goierriko taldea. Bidasoakoan, berriz, Jon Luzuriaga Hendaian bizi den ikaztegietarra, Igauri Lopetegi eta Manu Goiogana aritu dira kantuan. Leire Akizu izan da gai-jartzailea. Saio arina eta ederra egin dute sei bertsolariek, 50 entzule ingururen aurrean.
Leintz taldearen aurka kantatuko du finalean Zumarraga-Urretxuk. Haizea Aranak, Oihana Aranak eta Ane Zuazubiskarrek osatzen dute aurkarien taldea. Aian izango da finala, eta saio horretarako sarrerak eskuragarri daude bertsosarrerak.eus webgunean.