Urteroko ohiturari jarraituz, Harri jai eguna ospatuko dute Bedaion, maiatzaren 21ean. Asentsio egunetik zortzi egunetara egingo dute aurten ere, eta toka-txapelketa, bazkaria, bertso saioa eta afaria izango dituzte, besteak beste.
Egun bereziko egitaraua elizkizun batekin hasiko dute, 12:00etan, Andre Maria Jaiokundearen elizan. Bertatik abiatu eta prozesioa egingo dute San Isidrorekin, larreak eta soroak bedeinkatzeko. Amaitutakoan, toka-txapelketa egingo dute bertaratutakoentzat, eta 14:00etan bazkalduko dute, Artubi elkartean.
Arratsaldera begira, berriz, bertsolarien saioa izango dute, eta eguna afariarekin amaituko dute, 20:30ean, Artubi elkartean. Antolatzaileek adierazi dute bi otorduetara joan ahal izateko beharrezkoa dela aurretik izena ematea 664 037 741 telefono zenbakira Whatsapp bidez idatzita; eta maiatzaren 17a —igandea— izango da horretarako azken eguna.
Urteroko hitzordua
Harri jai eguna bakarrik ez, Bedaion urtero hutsik egin gabe antolatzen duten beste hitzordu bat da Bedaioko mendi martxa; eta, aurten, ekainaren 7an egingo dute.
Ibilbidearen bitartez Bedaioko inguru naturalak ezagutzeko aukera ematen du ekimenak, eta bidean zehar hainbat anoa gune jarriko dituzte. Bukaeran, ohitura duten bezala, haragi egosia, txorizoa eta salda banatuko dituzte bertaratzen direnentzat.