Ekitaldiz betetako astea izango dute Tolosako Antxon Bandres Bidaiarien Txokoan. Gaur izango da lehena. Migel Zeberio musikari tolosarrak eta Kepa Fernandez de Larrinoa antropologo eta poetak Estos ojos afilados poema-liburuari buruzko elkarrizketa egingo dute, eta psalterium instrumentuaren doinua eta giza mintzoa uztartuko dituzte. 19:00etan hasiko da saioa.
Etzi izango da aste honetako bigarren saioa. Jan Margarit Sole mendizale eta mendi korrikalari kataluniarrak Menditik mendira, bide ezberdinetatik aurrera! hitzaldia egingo du. Furgonetan bizitzeari buruz ere hitz egingo du. 19:00etan hasiko da ekitaldia. Korrikalari kataluniarrak Skyrunning World Series zirkuituko zenbait proba irabazi ditu.
Azkenik, ostiralean, antzerkiarekin gozatzeko aukera izango da. Supituki talde bilbotarrak bat-bateko antzerki saioa egingo du, gertukoa. Ikuslea izango da gidoilaria, eta momentuan sortuko dituzte istorioak. Saio hau ere 19:00etan izango da.