Bedaiorako errepidea konpontzeko lanak egiten ari dira egunotan. Joan den ostiralean hasi ziren lanean, eta zazpi eta hamar egun artean irautea aurreikusten dute. Obrak iraun bitartean herritarrak erne ibiltzeko ohartarazi dute instituzioek zein bedaiotarrek.
Aurretik ere aritu ziren errepidearen zati bat konpontzen, eta bigarren zatiari ekin diote orain. Gipuzkoako Foru Aldundiak bideratu ditu lanak, eta hainbat egiteko egingo dituzte, horien artean, errepidearen ertzak garbitzea, egoera txarrean dauden zatiak konpontzea eta, Ugartetik hasita, bidea asfaltatzea.
Konpondu ondoren, errepideko marrak maiatz eta ekain inguruan pintatuko dituzte.