Voith Paper Tolosako Apatta Industrialdeko enpresak papergintza industriarako ekipamendua eta zerbitzuak eskaintzen ditu. 186 beharginek egiten dute lan bertan. Bada, urte bukaerara arte ezarri nahi duten aldi baterako erregulazio espedientea negoziatzen aritu dira. Hain zuzen, atzo amaitu zuten negoziaketa epea eta
ez ziren akordio batetara ailegatu.
Enpresa batzordeak –ELAk bost ordezkari ditu eta lau LABek– esan du ERTEa negoziatzeko lehen bileran enpresak hamabost pertsona kaleratu nahi dituela adierazi zuela. Horrekin batera, batzordea bera enpresaren transmisio-uhala izatea nahi dutela salatu dute. Enpresa batzordeak argi adierazi du hori ez dela euren lana; «kontuan izan behar da ez gaudela ERE baten aurrean, ez litzatekeelako iristen beharrezko lege-mugara».
Pasa den urtean ere zuzendaritzak ERTE bat ezarri zuela gogoratu du enpresa batzordeak, eta ondoren adostu gabe luzatu egin zuela. Era berean, enpresa hitzarmena berritu gabe dutela ere gaineratu dute.
Enpresa batzordeak uste du Voith taldeak irabaziak handitu nahi dituela «Tolosako lanpostuen eta baldintzen kontura, enpresa berak onartu baitu irabaziak % 7tik % 10era igo nahi dituela.