Tolofolk jaialdia agurtu dute. Aurten seigarren urtea izan du kultura herrikoiari oihartzuna emateko helburu duen egitasmoak, eta guztira sei emanaldiz gozatzeko aukera izan da egunotan. Antton Valverderen kontzertuak itxi du aurtengo edizioa eta arrakasta handiz egin du gainera.
Berdura plaza jendez bete da, eta doinu edota abesti ezagun ugari entzun ahal izan dira emanaldian zehar. Izan ere, Euskal Herriko erreferenteetako bat da Valverde. Urte luzez olerki eta bertso zahar asko musikatu ditu, batik bat, pianoarekin lagunduta.Gaurkoan ere hala igo da oholtzara, eta musikari laukote baten laguntza izan du: Joxan Goikoetxea akordeoiarekin, Txema Garces tolosarra kontrabaxuarekin, Francisco Herrero biolinarekin eta Ivan Carmona biolontxeloarekin.