Ostegunean hasi zen Tolofolk jaialdia, eta gaur eguerdian ere izan du eskaintzarik. Kalepoza kalejira egiteko Tolosako Plaza Berrian elkartu eta, lehenengo, hainbat abesti kantatu dituzte Uharteko (Nafarroa) Jota Eskolako kideek. Txistularien txanda izan da segidan, eta haiek ere Plaza Berrian jo dituzte abesti pare bat.
Azkenik, kalejira abiatu dute, eta kalez kale aritu dira Tolosako Alde Zaharra girotzen. Goizekoa ez da, ordea, hitzordu bakarra izango; hain zuzen, arratsaldean ere kalejira egingo du Lasko Txarangak herritarrak Plaza Berrira gonbidatzeko, bertan egingo baitu Deixaas emanaldia Mercedes Peón artista galiziarrak.
