Lizardi Elkarteak emanaldi berezia antolatu du martxoaren 26rako. Esne Beltza taldearen letragile den Jon Garmendia Txuriak bere Ulhaintsaren negarra liburua aurkeztuko du, baina ez da aurkezpen soila izango, errezitaldia izango baita. Ortzi Oihartzabal Euskadiko Orkestrako biolin-joleak girotuko du Txuriaren olerki errezitatzea.
Egileak Ulhaintsaren negarra liburuan bere bizitzako hainbat gorabehera hartu ditu inspirazio-gai, gure herriko hainbat jenderen ibilbidearekin ere bat egiten dutenak: ihes egin beharra, ezkutuan bizitzea, espetxea, deserria, oroimina... Horiek horrela, errezitaldi musikatuan Jokin Aranalde errefuxiatu ohiak ere parte hartuko du, eta Martxelo Otamendik gidatuko du saioa.
Errezitaldi-musikatua martxoaren 26an, osteguna, izango da 19:00etan, Tolosako kultur etxean.