Astelehenetik aurrera, eta bi hilabetez, Tolosako trenbidearen ertzak garbitu, moztu eta sastrakak kenduko ditu Adif enpresak, Burdinbide Azpiegituren Kudeatzaileak. Trenbidearen segurtasuna bermatzeko eta suteak saihesteko egiten dituen ohiko lanak dira.
Tolosako geltoki nagusiaren eta apeaderoaren arteko lubakiaren ezaugarriak direla eta, lanak 00:00etatik 05:00etara egingo dituzte, asteartetik larunbatera arteko gauetan. «Guztiz ezinezkoa da egunez egitea, ez baitira bateragarriak trenen zirkulazioarekin eta katenarian tentsioa moztea eskatzen baitute», azaldu du Adifek.