2026ko inauterietako karrozen eta konpartsen ikuskizunak aztertu eta gero, lehiaketako saridunen zerrendaren berri eman du udalak. Karrozen kasuan, hiru onenak izendatu ditu epaimahaiak, eta datorren urtean kokalekua hautatzeko aukera izango dute.
Karrozak
1. postua: Amiano. Tolosako denda historiko batean oinarrituta, irudimenez jositako ikuskizuna egin dute, jostailu zahar eta berriekin. «Erakutsi dute parodia bat omenaldi ederrena izan daitekeela», esan du epaimahaiak. 
2. postua: Topic-eko lapurreta. Louvre museoko lapurreta Tolosara ekarri dute, irudimen handiarekin, eta txotxongiloak mozorroetan integratu dituzte. «Gaurkotasun handiko gai baten interpretazioa egitea erabat bat dator inauterien nortasunarekin», adierazi du epaimahaiak. .jpg)
3. postua: ETB. Askotariko mozorroak erakutsi dituzte: pilotariak, ikusleak, harri-jasotzaileak, sorginak, sukaldariak... «ETBren programazioa baliatuta, nostalgia modu dibertigarrian baliatu dute».
Konpartsak
Mugi-Mugi Toloxa. Mugi Tolosa ekimena parodiatu duen konpartsa. Hainbat belaunalditako parte hartzaileak izan dituzte eta, umorearen bitartez, kirola egiten jarri dituzte herritarrak.
Diru laguntza eskatzeko azken egunak
Bestalde, martxoaren 16an amaituko da 2026an karroza edo konpartsa gisa izena eman zuten taldeek diru laguntzaren eskaera egiteko epea. Erregistro elektroniko bidez egin daiteke eskaera, baita aurrez aurre Udaten ere. Dokumentu honetan daude deialdia eta oinarriak.