Gipuzkoako landa garapeneko proiektuei errekonozimendua egiteko asmoz sortutako Landaola Sariak banatu dituzte gaur. Landaola irabazi asmorik gabeko erakundea da, eta Gipuzkoako sei landa garapen elkartek osatzen dute: Tolosaldeko Tolomendik, Behemendik, Deba-Garaiak, Debemenek, Goimenek eta Urkomek.
Aurtengo sarietako bat eskualdeko Aldaba Zahar ustiategia izan da. Zehazki, Urteetako Ibilbideari Saria eman diote. Ustiategia urte luzez Xabier Almandozek gidatu du, eta Landaolak esan du ez dela ekoizpen hutsera mugatu; izan ere, ustiategi txiki baten bideragarritasuna, tokiko elikadura katearen sendotzea eta gizartean nekazariaren lanari berriro ere balioa ematea uztartu ditu. «Horregatik, nekazaritza eredu aurrerakoiaren eta konprometituaren adibide argia izan da Tolosaldean».
Esan dute intentsifikazio-eredua nagusi zen garaian hasi zutela proiektua, eta eskala txikiko, gertuko eta lurraldearekiko lotutako planteamendua jarri zutela erdigunean. «Tokiko merkatuari eta harreman zuzenari lehentasuna ematea zen helburua, kontsumitzaile eta ekoizleen arteko lotura zuzenak sendotuz. Ustiategiak, gainera, nekazaritza ekintza ekonomikoa ez ezik, ekintza soziala eta politikoa ere badela erakutsi du, ibilbidean zehar landa ingurunearen biziraupena, elikadura-burujabetza eta lurraren zaintza aldarrikatu baititu. Ikuspegi horiek eragin zuzena izan zuten inguruko ekoizleengan eta Tolosako kontsumo ereduaren inguruko eztabaidetan. Hori dela eta, gaur egun normalizatuagoak diren planteamendu askoren aitzindari isila izan da».
Proiektua kanpotik etorritako gazteen ekimen kolektiboaren emaitza dela ere nabarmendu du Landaolak. Hiritik landara egindako jauzi kontziente baten bidez, nekazaritza-eredu familiar tradizionalarekin hautsi eta nekazaritza eta ekologia balio zentral gisa zituen proiektua martxan jarri zuten, komuna moduan antolatuta eta sektorearekiko konpromiso argiarekin. Horregatik, Biolur elkarteko kide aktiboak izan dira, Manttangorri proiektuaren sustatzaileak eta, urte luzez, Tolomendi landa garapen elkarteko batzordearen parte.