Etorkizunean haurrek euskaraz jarrai dezaten txikitatik euskarazko ingurune batean haztea funtsezkoa dela uste du Taupa mugimenduak. «Inguru horretan eragiteko ahalmen gehien dutenak gurasoak izanik, Euskal Herri osoan eragiteko asmoz gurasoei zein haurrei zuzendutako ekimen berri bat jarriko dugu martxan udaberrian: Eusfera», esan dute. Egitasmo hori Tolosaldean antolatzeko bilera irekia egingo dute; Galtzaundi Euskaltzaleen Elkartearen egoitzan izango da martxoaren 11n, 18:00etan. Bilera eskualdeko ikastetxeetako eta guraso elkarteetako ordezkariez gain, herritar ororentzat irekia da.
Eusfera ekimena Euskal Herri osoan egingo dute maiatzaren 7tik 17ra. 0 eta 12 urte bitarteko haurren ingurunea euskaldunagoa izatea nahi duten familientzako ekimena da. Norabide horretan aurrerapausoak eman nahi dituzten familiei baliabideak, tresnak eta euskarazko espazio berriak eskainiko dizkiete, eta horretan hasi nahi duten familiei, berriz, abiapuntu eroso bat. Beraz, haurren gurasoak (edo guraso rola betetzen duten helduak), dira ekimenaren jomuga, euskara jakin ala ez.