Munduaren zilborra uste izana egotzi izan zaie maiz tolosarrei. Zaldunita egunean konplitzen da esana, mundu asko kabitu baitira gaur San Frantzisko ibiltokian, Trianguloa plazan, Rondilla kalean eta Alde Zaharreko kaleetan.
Zenbat Donald Trump ibili da gaur Tolosan? Zenbat Nicolas Maduro? Bad Bunnyren bat ikusi? Bada Tolosan Beloradoko mojak ikusi dituenik ere. Satira eta kritikak balio du munduaren ispilu lana egiteko; boterea ezbaian jartzeko, joera ideologikoak bistarazteko eta gaur egungo kezkak zeintzuk diren azaltzeko.
Mozorroa bada babesa, egunerokotik tentsio sozialetik askatzen laguntzen diguna. Zaldunita egunean lizentzia eman diogu geure buruari geure buruaz barre egiteko, aldamenekoa kritikatzeko eta parekoarekin adiskitzeko; behintzat Hausterre eguna bitartean.
Glokala esaten zaio globala eta lokala uztartzeari eta hori bera egiten da Tolosako inauterietan: gaur, eskualdean pil-pilean dauden gaiek izan dute tokia, hala nola Zubiberriaren eraisteak; Mugi Tolosako aitona-amonak, herriko puritanak, Izaskungo kroketak, bailarako ski estazioa... Atzo haserrerako motibo izan zitekeena gaur barre egiteko aitzakia.
Zalantza gutxi zegoen inauterizaleek asmatuko zutela beste behin ere, ez zegoela eguraldiaren kuidado handirik. Eta bai, gaur, mundu guztia kabitu da Tolosako zilborrean.