Kalean ibiltzeko ez zen girorik izan atzo. Eguraldiagatiko abisu horia eguerdira arte iragarri bazuten ere, arratsaldeko inauterietako zenbait ekitaldi bertan behera uztea erabaki zuten arduradunek, adibidez, haurren danborrada.
Orduek aurrera egin ahala eguraldiak hobera egiten ez bazuen ere, Zerkausian bildu ziren helduen danborradako konpainiak hitzordua hasi baino ordu erdi lehenago. Ziurgabetasun une batzuen ondoren, ordea, emanaldia bertan egitea erabaki zuten arduradunek.
Harrera beroa
Giro kaskarra gorabehera, herritar ugari bertaratu ziren urteroko hitzordura. Hain zuzen, aterpean eta herritarrez inguratuta, aldiro bezain fin aritu ziren Tolosako Udaleko Musika Bandako musikariak, danborrariak eta Numen dantza eskolako kosako dantzariak.