Tolosako Erraldoi eta Buruhandien konpartsak ez du hutsik egin Zaldunita bezperan. Eguraldiak lagundu ez arren eutsi diote urteroko ohiturari eta Ferialekuan, erraldoi eta buruhandien etxean antolatu dute bisita. Haur asko bertaratu dira haiekin dantza eta salto egitera.
Konpartsako Iñigo Arzallusek eta Jon Diezek azaldu dute alternatiba bat eskaintzeko moduan egon direla. «Zorte hori daukagu konpartsan, badugu espazio bat Ferialekuan». Goizeko lehen orduan egin dute deia bertara azaltzeko eta tolosarrek erantzun dute, makina bat ume gerturatu da euren gurasoekin erraldoien etxera.
Eskolekin egin ohi duten bezala, saio pedagogikoa eman dute gaur. Erraldoi eta buruhandiez gain, konpartsakoek erabiltzen dituzten gainerako materialak erakutsi dituzte.
Dultzainero taldearen eskutik dantza egin dute erraldoiek eta saioaren amaieran haiengana gerturatzeko aukera izan dute txikienek. Buruhandiekin jolasen ere ibili dira gaztetxoak.
