Zaldunita bezpera euritsu dator. Horrela aurreratu du Iker Ibarluzea meteorologia adituak: «Giro kaxkarrarekin hasiko da eguna. Goizean sarri botako ditu zaparrada mardulak, ekaitzak jotzea baztertu gabe». Eguraldi iragarpenari kasu eginda beraz, Tolosako Udaberri dantza taldeak biharko kalejira bertan behera uztea erabaki du.
Gainontzeko ekitaldiak
Tolosako Udalak jakinarazi bezala, gaur-gaurkoz bertan behera geratu den ekitaldi bakarra dantzari txikien kalejira da. Esaterako, Erraldoi eta Buruhandien konpartsak bihar goizean erabakiko du kalejira egingo duen ala ez. Kalejira ez egitea erabakiz gero, Ferialekuan egingo dute emanaldia. Eta Aiz-Orratzek berriz, bihar arratsaldean erabakiko du haur-danborradarekin aurrera egitea edo bertan behera uztea.