Urteko lehen azoka berezia egingo dute larunbatean Tolosan: Zuhaitz Azoka. 30. edizioa izango da aurtengoa, eta bederatzi postu jarriko dituzte Trianguloa plazan; 09:00etatik 14:00etara bitarte egongo dira zabalik. Bederatzi postuetatik zazpi mintegien salmenta postuak izango dira; zuhaitzak, zuhaixkak, haziak, landareak eta loreak erosteko aukera egongo da.
Horiez gain, Gipuzkoako Baso Elkarteak informazioa emateko postu bat jarriko du. Eusko Jaurlaritzako herritarrentzako ingurumen hezkuntza zerbitzuaren Aztertu programak ere izango du postua. Informazioa emango diete bisitariei, eta hauek hazien ponpak sortzen ikasteko aukera izango dute, Ezagutu, zaindu eta ekin zure ingurunean programaren bitartez.