Ostiralean (urtarrilak 30) Adierazteko moduak... Irudiak eta mezuak erakusketa inauguratuko dute Tolosako Aranburu Jauregian. Askotariko arte diziplinatako lanak ikusgai egongo dira bertan, hala nola, pintura, eskultura eta olerkiak. Carmen Mateo Orus tolosarrak akuarelarekin egindako lanek, Xabier Olano Jauregi altzotarraren eskulturek eta Silvia Mateo Orus tolosarraren olerkiek osatuko dute erakusketa. Hiru artista eta hiru adierazpide.
Egileen hitzetan, sortu diren sinergiekin gozatu dute gehien: «Baten kasuan, margoek, koloreek eta formek laguntzen diote bere barne bizitza islatzen; haiekin jolastuz sentitzen da osoen. Beste batek egurrean aurkitu du baliabide noble eta zintzoa. Material horren izaera biziak eta beroak erakarrita, haren tolesdurak eta zimurrak aprobetxatzen ditu irudiak sortzeko. Hirugarrenarentzat, aldiz, hitzak dira komunikatu nahi duena esateko baliabide kuttunena. Gehien maite duen hizkuntzan».
Ostiralean zabalduko dute erakusketa, 19:00etan egingo duten inaugurazio-ekitaldiarekin, eta martxoaren 7ra bitarte egongo da zabalik.