Larunbat honetan, urtarrilak 10, Oroimena borrokan eraiki erakusketa ikusgai jarriko du Tolosaldeko Kontseilu Sozialistak Tolosako kultur etxean. Gerra garaia eta Frankismoa Tolosaldean nolakoak izan ziren azalduko dute; gerra aurreko garaia, gerrako urteak, gerraostea eta 1960. urtetik 1975. urtera bitarteko erresistentzia lantzen dituen bilduma da.
10:00etatik 14:00etara egongo da ikusgai erakusketa, eta zenbait irudi historiko biltzen dituzten panelez osatuta egongo da. 11:00etan erakusketa gidatua egingo dute historialari batekin; azalpen sakonagoak entzun ahal izango dituzte joaten direnek.
Kontseilu Sozialistari «garrantzitsua» iruditzen zaio historikoki gertatutakoa ezagutzea eta ezagutaraztea. «Garai latzak izan ziren, erregimen faxista baten errepresioa nonahi, erbesteratzea, fusilamenduak...». Gainera, «mundu justuago baten alde altxatu zirenak omentzeko» baliatu nahi du erakusketa. «Gaur egun ere, inoiz baino ozenago entzun ditzakegu faxismoaren oihartzunak, eta, beraz, inoiz baino garrantzitsuagoa da faxismoak gurean utzitakoak oroitzea, eta haren aurka antolatzeko beharraren kontzientzia piztea», adierazi dute.