Kontseilu sozialistatik azaldu dutenez elkarretaratzean, AEBetako presidente Donald Trumpek agindutako aire-bonbardaketa gogorra jasan zuen Venezuelako hiriburuak. Gutxienez zazpi leherketa izan ziren hainbat instalazio militarretan, hala nola Fuerte Tiunan eta La Carlota hegazkin-basean. Lekukoek azaldu zuten aire-ontzien hegaldi iraunkorrak izan zirela altuera baxuan, baita aldizkako dardarak eta hiriburuan etengabe altxatzen ziren ke-zutabeak ere. Halaber, Donald Trump Ameriketako Estatu Batuetako (AEB) presidenteak iragarri zuen indar estatubatuarrek Nicolas Maduro Venezuelako presidentea eta haren emaztea bahitu zituztela.
Tolosaldeko Kontseilu Sozialistak Venezuelako langileriari elkartasuna adierazi eta haien erresistentziarako eskubidea aldarrikatu nahi izan ditu. Argi adierazi dute «AEBk beren kontrolpeko erregimen bat ezarri nahi dutela Venezuelan, multinazional yankien etekin pribatua handitzera bideratuta». Gainera, «Estatu Batuen eskutik etorriko litzatekeen gobernu batek eskuin muturra indartzea ekarriko lukeela; eta aldi berean, bertako milaka familiaren pobretze bat ere, eskubide politiko oro ezabatzea ekarriko bailuke».
Horrekin batera, faxismoaren eta inperialismoaren aurka borrokan jarraituko dutela adierazi dute.