Gipuzkoako Foru Aldundiak jakinarazi du Usabalgo kirol parkearen eta Olarrain auzoaren arteko bidea egonkortzeko lanek bi asteko etena izango dutela Gabonetan. Eten hori baliatuz, errei bat zabalduko dute, herritarrek bertatik pasatzeko aukera izan dezaten.
Ostirala izango dute azken lan eguna, eta egun horretan zabalduko dute bidea; urtarrilaren 7ra arte egongo da irekita. Egun horretatik aurrera, berriro ere itxi egingo dute guztiz, lanak amaitu bitarte. Zabalik geratuko den bidea estua denez, bizikletaz doazenei ere oinez joateko eskatu die udalak, «gainerako erabiltzaileekiko begirunez».