Tolosako Hezkuntza Kontseiluak 2024ko urrian hasi zuen bidea. Hezkuntza-arloko eragileen arteko elkarlana bideratzeko foroa da. Bi organotan egituratuta dago. Batetik, hilero elkartzen den Batzorde Iraunkorra. Kide hauek osatzen dute: oinarrizko hezkuntzako ikastetxeak (Samaniego, Orixe, Herrikide eta Laskorain), udaleko talde politikoak eta udal-teknikariak. Batzorde iraunkor horren eskutik, elkarlanerako hainbat jarduera bideratu dituzte ikastetxeen artean. Bestetik, Kontseiluaren Osoko Bilkura dago. Hezkuntzako eragile guztiek parte hartu dezakete, baita edozein herritarrek ere, bilkurak irekiak baitira.
Hain justu, bilera ireki horietako bat egingo dute asteazkenean, abenduaren 17an 18:00etan izango da, kultur etxeko lehen solairuan. Helburua izango da 2025ean egindako jardunaren berri ematea, eta 2026rako erronka nagusiak aurkeztea. Bilera irekia denez, interesa duen herritar oro joan daiteke.