Tolosako Udalak datorren ostiralean, abenduak 5, piztuko ditu herrian zehar jarritako Gabonetako argiak. Azken urteetan egin bezala, ekitaldi txiki bat antolatu du Plaza Berrian; 19:00etan hasiko da. Eduardo Mocoroa Udal Musika Eskolako akordeoi, biolin eta txistu ikasleek girotuko dute ekitaldia. Urteroko ohiturari jarraituz, haiek arduratuko dira argiak pizteaz. Gainera, argiztatutako panpinak jarriko dituzte plazan, herritarrek argazkiak egiteko. Euria eginez gero, kioskoan egongo dira.
Aldaketak izango dira aurtengo argiterian. Iaz amaitu zen orain arteko kontratua, eta lizitazio berria egin du udalak. Orain arteko enpresa berak lortu du esleipena, baina zenbait aldaketa izan dira kontratu berrian, eta argi berriekin argiztatuko dute herria. Aldaketa gehiago ere proposatu zituen udalak. Esaterako, aurreko urteetan baino leku gehiagotan jarri dituzte argiak, eta udaletxean Mari Domingi irudikatzen duen argiztatutako irudia ere jarriko dute; orain arte, Olentzerorena bakarrik jarri izan dute. Kasu guztietan, kontsumo baxuko Led argiak erabiliko dituzte.
Amaitzeko, udalak aurreratu du aurki emango duela Eguberrietako egitarauaren berri.