Tolosaldeko EH Bilduk babesa adierazi die Asuncion Klinikako langileei, biharko, larunbata, Tolosan deitutako mobilizazioaren harira.
Eskualdeko osasun sistemaren etorkizuna oraindik argitu gabe dagoela esan du EH Bilduk, eta Asuncion Klinika eta bertako langileen etorkizuna argitzea beharrezkoa dela «Tolosaldean osasun arretarekin dugun arazoa benetan konpontzeko». «Tolosaldeko herritarrei bermatu behar zaien kalitatezko osasun eskubidea ziurtatzeko, osasun langileak zaindu eta euren etorkizuna argitzeko bermeak ezinbestekoak dira».
Bestalde, eraiki asmo duten ospitale berriaren inguruan, gaur-gaurkoz ez dagoela plan funtzionalik, «ezta beharrezko azterlanik ere» gogoratu du koalizioak. «Zehaztasun falta horrek ezinegona sortzen du herritarren eta langileen artean. Eskualderako osasun arreta erabat publikoa, kalitatezkoa eta euskalduna bermatzeko beharrezkoa da Osasun sailak, behingoz, planteamendu sendo eta egingarri bat mahai gainean jartzea, datu eta azalpen argiekin».
Hain justu, EH Bilduk Osasun sailburuaren agerraldia eskatu du Legebiltzarrean «beharrezko argipen eta azalpenak eman ditzan». Asuncion Klinikako langileen agerraldi bat ere eskatu asmo dute, «beren kezkak eta aldarrikapenak osasun batzordean azaldu ditzaten».