Tolosako Udaleko Euskara Sailak bi hitzaldi antolatu ditu familientzat, seme-alabekin eta euskararekin lotuta. UEMA Udalerri Euskaldunen Mankomunitatearen bidez emango dira bi saioak.
Lehena familia erdaldunei zuzendua dago. Seme-alabei, nahiz eta euskaraz ez jakin, nola lagundu landuko dute. Tolosan eskolatutako umeak D ereduan ari dira, euskaraz, baina guraso batzuek zailtasunak izaten dituzte seme-alabei laguntzean, euskaraz ez dakitelako. Azaroaren 19an izango da hitzaldia, 17:30ean Galtzaundiren Plaza Berriko egoitzan; gaztelaniaz izango da.
Bigarren hitzaldia guraso euskaldunei begirakoa da, eta hau izango da izenburua: Nola eragin gure seme-alaben hizkuntza-ohituretan? Saioaren helburua da seme-alaben hizkuntza-jokabideak ulertzea, eta familiak nola eragin dezakeen lantzea. Abenduaren 2an izango da saioa, euskaraz. Hau ere Galtzaundiren egoitzan izango da, eta 17:30ean hasiko da.
Bi saioak irekiak izango dira, doakoak, baina aurrez eman behar da izena; gaztelaniazko saiorako, lotura honetan, eta euskarazko saiorako, lotura honetan.
UEMAren Hedatu hezkuntza-proiektuaren barruan txertatu dituzte saioak. Tolosako ikastetxe guztietan lantzen dute proiektua, eta hiru jomuga nagusi ditu: ikasleak, hezitzaileak eta familiak. Hain justu ere, hitzaldi hauekin familietan eragitea da helburua.