Gipuzkoako Foru Aldundiak erabat itxiko du Usabalgo kirol parkearen eta Olarrain auzoaren arteko bidegorria eta oinezko bidea astelehenean. Lurra hondoratuta dago tarte horretako zenbait puntutan, eta zoladura guztiz konpondu nahi dute. Horretarako, orain arteko zoladura guztiz altxako dute eta, berria egin aurretik, egonkortasun handiagoa emango diote. Maldan dagoen 170 metro inguruko tartea da kaltetuena, eta hor zentratuko dira lanak batik bat.
Zoladura eraitsiko denez, bidea guztiz moztu beharko da, eta ezingo da bertatik pasa. Itxiera Usabalgo kirol parkearen amaieran eta Olarrain auzoko autobidearen bidegurutzean egingo da. Aldundiaren arabera, ondo bidean, hiru hilabeteko epea beharko dute lanek gutxi gorabehera.
