Dotore eguna ari dira ospatzen Tolosan. Lehen aldiz ari dira ospakizun hau egiten, eta gisa bereko egunak antolatzen urteak daramatzaten herrietatik hartu dute ideia antolatzaileek. Bada, deialdiak arrakasta izan du, eta ia 200 pertsona elkartu dira egunaz gozatzeko.
Eguerdian ekin diote festari, txarangen doinuekin, eta ondoren brindisa egin dute Berdura plazan. Bertan egin dute, hain justu bazkaria. Arratsaldean, Asier Saizar magoaren saioa eta zenbait sorpresa izango dituzte, eta ondoren, txaranga doinuak izango dituzte ostera. Iluntzean, DJ Rani ariko da Alde Zaharreko kaleak musikaz girotzen.