Tolosako Alde Zaharrean bigarrenez ospatuko da aurten Gau Beltza, Galtzaundi Tolosaldeko Euskaltzaleen Elkarteak antolatuta. XX. mendearen erdialdera arte euskarari eta euskal landa-eremuari oso lotuta egon zen tradizioa berreskuratzea da helburua.
Aurtengo ekitaldiaren barruan, misterioa eta antzerkia uztartzen dituen Arimen ibilbidea antolatu da. Ibilbidea Soldadu kalean hasiko da, Rondila kaletik Atadi eta ondoren Zerkausira, Plaza Zaharra zeharkatu ondoren, Euskal Pizkundea plazan amaituko da. Amaieran, dantza, musika eta antzerkia uztartzen dituen ikuskizun batekin borobilduko da ekitaldia, sorpresak barne.
Parte hartu nahi dutenek ez dute aurretik izena eman beharko; nahikoa izango da ekitaldira bertaratu eta 19:45ean hasiko den taldera batzea.
Gau Beltzeko jantziekin
Galtzaundik, halaber, herritarrak Gau Beltzeko jantziekin mozorrotzera animatu ditu, baita makilak eta kandelak eramatera ere, antzerkiaren giroan parte hartzeko.
Gau Beltza antolatzen, Galtzaundiz gain, Udaberri dantza taldea, Tolosaldeko Ahots Gazteak abesbatza eta eskualdeko hainbat antzerkigile eta euskaltzale aritu dira. Guztira 60 boluntariok baino gehiagok hartuko dute parte ospakizunean.