Galtzaundi elkarteak tertulia literarioaren saio berri bat antolatu du. Hilabetero, azken asteazkenean egin ohi dute saioa, eta oraingoan, urriaren 29an izango da. Iñigo Astiz Iruñeko poeta eta kazetaria joango da elkartearen egoitzara, Monogamoak haren lehen ipuin liburuaren inguruan hitz egiteko. 19:00etan hasiko da tertulia eta Yurre Ugartek dinamizatuko du.
Monogamoak eleberriaren sinopsia:
Opari osagabe baten oroitzapena, hildakoen ilarak eta hiltzaileenak, Lizasoko komuna eta haren itzalean hartutako bainua, biribilguneen utopikoak, gazte bat pintadak garbitzen, andre bat katu baten marruen eta amaren azken egunen artean, sasoiz kanpoko norbaiten itzulera, infinitura multiplikatutako tximinoak, balizko pailazo bat, txanpon-makinen zarata eta hondoko konplizitatea, une batez den-dena geratu uste izan zuen isiltasun bat.
Giroz, garaiz eta tonuz, eremu zabal bat bildu du Iñigo Astizek bere lehen narrazio bilduman. Aro bakoitzean jendeak elkarri eusteko botatzen dituen sokez ari da, komunikazioaz eta haren faltaz, eraikuntza historiko, politiko, kulturalen alde makurraz zein absurdoaz. Argitasunez eta ironiaz, soiltasunez eta saturazioz, bizidun ororen orekari urratsak datoz kontakizunotan.