Tolosako Udalak eta hainbat eragilek Haurren Hiriaren edizio berria abiatuko dute azaroan. Proiektuaren helburua da 8 eta 12 urte bitarteko haurrek herriko espazio, zerbitzu eta erabakietan parte hartzea. Aurten, Tolosako ingurune fisikoa eta emozionala aztertu eta landuko dute, Udalerri on! lelopean.
Apirila bitarte, lau saio egingo dituzte haurrekin, eta bi bilera familiekin. Maiatzean, Mintza Txokoa egingo dute udaletxean; haurrek proposamenak aurkeztuko dizkiete udal ordezkariei. Proiektuan izena emateko aukera zabalik da, ostiralera arte; tolosakohaurrenhiria@gmail.com-era mezua bidali behar da. Ondoren, zozketa bidez erabakiko dira parte hartzaileak.