Tolosan, hilabetean behin, azken larunbatetan, kalean kantuan aritzeko hitzordua egin ohi du Tolosa Kantari taldeak. Bada, urriaren 25erako, egitasmoa aurrera ateratzeko lanean aritzen diren antolatzaileei, musikariei eta zuzendariei aitortza egin nahi diete, eta horretarako, bazkari bat antolatu dute Haritzpe elkartean –erretirodunen zentroa–. «Esker oneko bazkaria izango da, egiten ari diren lanagatik. Hortaz, haiek gonbidatuta daude», adierazi dute taldeko kideek.
Herritarrak ere gonbidatuta daude bazkarira. Otordura joan nahi duenak, izena eman beharko du, urriaren 20a baino lehen (goizez, 08:30etik 10:00etara). Izena emateko, 35 euro ordaindu beharko du bakoitzak, izen-abizenak azalduta, ondorengo banku-kontuan: ES93 3035 0028 12 0281188020 (Laboral Kutxa). Bazkariaren egunean, ordainagiria eskatuko dute.