Aurten ere, San Esteban auzoko Ttonttor Auzokide Kultur Elkarteak, Tolosako Herri Krosa antolatu du; 37. edizioa izango da. Ohi bezala, urriaren 12an egingo dute, auzoko kultur astearen barruan. Bada, parte hartzaileei aukera berriak eman asmoz, aurten, berrikuntza bat izango du krosak. Bi lasterketa izango dira, aldi berean: 5 eta 10 kilometroko bana. Erabat laua den bost kilometroko zirkuitu bat diseinatu dute. Korrikalari batzuek bira bat eman beharko diote; beste batzuek, berriz, bi.
Antolatzaileen ustez, formatu hau «erakargarriagoa» da parte hartzaileentzat. «10 kilometro egitera ausartzen ez direnei lasterketa herrikoiagoa eta errazagoa egiteko aukera eman nahi diegu. Aldi berean, lasterketetan aritu ohi diren korrikalariei bi probatako batean erreferentziazko markak egiteko aukera eman nahi diegu», azaldu dute.
11:00etan hasiko da krosa, eta bi probatako batean parte hartu nahi duenak Kronoak.com webgunean eman behar du izena; 13 euro ordaindu behar da. Ondoren, urriaren 11n, 11:00etatik 20:00etara bitarte jaso ahal izango du dortsala, Ttonttor Elkartearen lokalean (Ferialekua). Hilaren 12an, 10:00ak baino lehen ere jaso ahal izango da dortsala.
Ondoren, haurren txanda
Helduen krosa amaitutakoan, haurren txanda izango da. 12:00etan hasiko da Tolosako X. Txiki-Krosa, eta bi kategoria izango dira: 9 urte artekoak (500 metro) eta 10 eta 14 urte bitartekoak (1.250 metro). Ez da sailkapenik egongo, eta, izena emateko, Saharako kanpamenduetara bidaltzeko eskolako materiala eraman beharko da, egunean bertan.