Azokarekin agurtu dute, goizean, Kultura Plazara jaialdia. Egitasmo honi esker, aste hauetan kultur eskaintza zabala izan da eskualdeko hainbat herritan, baina azken hiru egunotan kulturaz busti da Zumardiaundia. Node dantza konpainia, Rüdiger, Izaki Gardenak, Bea Asurmendi eta Sukena bezalako artistek hartu dute plaza, baina gaur eskualdeko artisauen txanda izan da.
Guztira, hamabost postu izan dira plazaren bueltan, eta bertan, askotariko sorkuntza lanak ikusi eta erosteko aukera izan da; hala nola, artelanak, arropak, serigrafia lanak, oihalekin egindako lanak eta bitxiak. Giro ederra izan da goiz osoan zehar eta herritar ugari bildu dira azokaren bueltan. Gainera, erakusmahaiez gain, jana eta edana ere izan da.