Larrañeta harriak 124 kilo ditu, eta iaz bezala, Mikel Lopetegi zen faboritoa, Paulo Azpiazurekin batera. Urrak eman dio hasiera txapelketari. Iazko marka baino bi jasoaldi gutxiago egin baditu ere, bere lana bikain egin du, 5 minututan 18 jasoaldi eginez. Azpiazuri marka jakinda tokatu zaio lanean hastea, eta hasieratik moldatu da harri baldarrera, iazko marka gaindituz: 20 jasoaldi. Zailtasun handienak Beñat Telleriak izan ditu. Nola heldu zalantzak zituen eta denborak ihes egin dio. Hala ere, Telleriak ez du amaiera arte amorerik eman eta bost jasoaldirekin amaitu ditu lanak.
Emakumezkoek 72 kiloko harri baldarrarekin egin behar izan dituzte lanak. Horien artean Ainitze Zumeta zen gaurko faborito eta erakustaldi bikaina eman du zarauztarrak. Hasieran lasai hasi da, Joxeramon Iruretagoiena entrenatzaileari kasu eginez, baina azken segunduetan estutu egin du eta 22 jasoaldirekin amaitu ditu lanak.
Gauzak honela, Azpiazu eta Zumeta izan dira aurtengo irabazleak Bedaion. Honela geratu dira gainontzeko sailkapenak:
Gizonezkoak
- Paulo Azpiazu, 20 jasoaldi.
- Mikel Lopetegi Urra, 18 jasoaldi.
- Gorka Etxeberria, 16 jasoaldi.
- Gari Garmendia, 13 jasoaldi.
- Imanol Royo Lartain, 12 jasoaldi.
- Beñat Telleria, 5 jasoaldi.
Emakumezkoak
- Ainitze Zumeta, 22 jasoaldi.
- Goizeder Abendibar, 16 jasoaldi.
- Maddi Gesalaga, 15 jasoaldi.
- Lierni Osa, 15 jasoaldi.
- Olaia Esnaola, 15 jasoaldi.
- Elene Ostolaza, 11 jasoaldi.