Ekaineko euriteen ondorioz, Arrameleko zubiaren inguruan enbor eta bestelako hondakin ugari pilatuta geratu ziren. Uraren Euskal Agentziak horiek jasotzeko lanen ardura hartu zuen. Bada, datorren astelehenean, irailaren 8an, abiatuko ditu lanak.
Lan horiek egiteko, beharrezkoa izango da Jon Andoni Irazusta pasealekuaren zati batean errei bateko trafikoa aldi baterako etetea. Izan ere, garabi baten bidez jaitsiko dute makineria ibaira, zaborra pilatu den tokira, eta pixkanaka aterako dituzte hondakinak. Egun batzuetarako lana izango da.
Astelehenean, 08:00ak aldera itxiko dute erreia. Dena dela, bi norabideetako trafikoa baimenduko da, txandaka. Hala eta guztiz ere, Udaltzaingoak inguru hori ekiditeko eta beste bide batzuk lehenesteko dei egin du, ahal den neurrian behintzat.