Denboraldi hasierako argazkia atera zuten atzo arratsaldean Tolosa CF-ko futboleko gizonezkoen talde nagusiak. Erregional ohorezko mailan jokatuko du, eta Josu Ibarbia da bere entrenatzailea. Denboraldiaurrea «ilusio eta gogo handiz» egiten ari direla esan du Ibarbiak. Irailaren 13 eta 14ko asteburuan jokatuko dute ligako lehen partida, Eibarko Urki taldearen aurka, etxetik kanpo.
Ibarbiak gaineratu duenez, entrenamenduen maila «oso altua» izaten ari da: «Karga handiarekin ari gara, baina jendea errendimendua ematen ari da. Jokatu ditugun partidetan ere sentsazio onekin gabiltza. Gustura gaude, beraz». Jomugan Hirugarren Mailako igoera lortzeko borrokan egotea izanik, Ibarbiak egunerokotasunari begiratzen dio: «Helburua da astelehenetik ostiralera ahalik eta ondoen entrenatzea, eta gero partidetan ausartak izan baloiarekin, eta baloirik gabe oso biziak eta oldarkorrak izan. Gero, etortzen diren zaleek ikustea talde honek transmititzen duena ona dela, gustatzen zaiela, eta ikusi dezatela talde ausart eta gogor bat. Partidetan dena utziko dugu klub eta herri honengatik».