Udal jabetzako eraikinetan jasangarritasuna eta eraginkortasuna hobetzeko beste obra baten berri eman du Tolosako Udalak. %100 berriztagarria den galdara berria jartzeko lanak hasi ditu Gorosabel eraikinean; besteak beste, Musika Eskola eta Aitzol Udal Euskaltegia daude bertan. «Efizientzia energetiko hobea duen sistema aukeratu da. Orain arteko galdara gas bidezkoa zen; berria, aldiz, biomasazkoa izango da», azaldu dute.
Obra egiteko, 179.413,72 euroko inbertsioa egingo du udalak. Horretarako, 105.350 euroko diru laguntza jaso du, ekonomiaren hainbat sektoretan energia berriztagarri termikoen instalazioak ezartzeko pizgarri-programaren barruan, zeina Europar Batasunaren Next Generation EU funtsak finantzatutako Suspertze, Eraldatze eta Erresilientzia Planaren esparruan sailkatzen den.
Lanek bizpahiru hilabeteko iraupena izango dutela esan dute, datorren udazken-negurako prest egon dadin. Galdara berria jarriko dela aprobetxatuz, erradiadoreen tenperatura urrutiko kontrol bidez egokitu ahal izateko sistema jarriko du udalak, energiaren kontsumoa murrizteko helburuarekin.