Ander Martinez De Rituerto Realeko atleta tolosarrak 23 urtez azpiko Espainiako Txapelketa irabazi du pertika jauzian, asteburuan, 5,40 metroko jauziarekin. Super Amara BAT taldeko Mario Estanga tolosarrak ere pertika jauzian parte hartu zuen, eta zortzigarren postua lortu zuen 4,90 metroko jauziarekin.
Podiuma zapaldu zuen txapelketa horretan Manex Civico Tolosa CF-ko tolosarrak 3.000 metro oztopoetan, 8.48,15eko denborarekin hirugarren eginez. Tolosa CF-ko beste atleta batek ere parte hartu zuen, Ane Martin tolosarrak, eta seigarren postua lortu zuen 1.500 metroko proban, 4.30,95 eginez.
Emaitza horiekin, Martinez de Rituertok eta Civicok 23 urtez azpiko Europako Txapelketan parte hartzeko aukera lortu dute. Txapelketa Bergen herrian (Norvegia) jokatuko da, uztailaren 17tik 20era.