Ikasturtea amaitu berritan, Samaniego ikastetxeko haur hezkuntzako eraikineko argiteria aldatzen hasi da Tolosako Udala. «Jasangarritasunean eta eraginkortasunean hobetzea da lanen helburua, Euskadiko Jasangarritasun energetikoaren legearen eskakizunei aurre egiteko», azaldu dute udaletik.
Eraikinak, orain arte, fluoreszente konbentzionalak izan ditu eta, horien ordez, LED motako argiteria jarriko du udalak. 300 luminaria baino gehiago ez ezik, sentsore bidezko kontrolak ere jarriko dituzte. Aldaketa horrekin, argiteria kontsumoa %50 baino gehiago murriztea da udalaren helburua, eta horretarako, 124.000 euroko inbertsioa egingo du.
Uztailean eta abuztuan itxita egongo da Samaniego, eta hilabete horiek baliatuko dituzte lanak egiteko. Ikasturte berria hasterako, beraz, guztia prest izatea da udalaren eta ikastetxearen aurreikuspena.